Mushahid Razvi

استاذِ زمن مولانا حسن رضا بریلوی کی ایک بہترین غزل ؎

*سوداے عشق*

آنکھیں جب پھوٹیں تو دیکھا جلوۂ زیباے عشق
کوڑیوں کے مول ہم کو مل گیا سوداے عشق

یار کا جلوہ اگر دَیر و حرم میں دیکھتا
خاک اُڑاتا جنگلوں میں کس لیے رُسواے عشق

جو ہوا بدنام اُلفت نام نیک اُس کا رہا
اُس کی عزت ہو گئی جو بن گیا رُسواے عشق

پرتوِ داغِ محبت کی تجلی دل میں ہو
شمع لیلیٰ دل ہو یا رب جلوۂ لیلاے عشق

پھر بہار آئی بڑھے جوشِ جنوں کے ولولے
پھر نئے سر سے ہوا پیدا مجھے سوداے عشق

خون ہو جائے وہ کم بخت آنکھ جو پُر نم نہ ہو
خاک ہو جائے وہ دل جس میں نہ ہو سوداے عشق

شورِ محشر کیا سنے صورِ قیامت کیا سنے
شورِ افگن جس کے کانوں میں رہے غوغاے عشق

دونوں عالم سے مجھے کھو کر ملا ہے آج تو
مرحبا صد مرحبا اے جلوۂ زیباے عشق

چاہ اُس بحرِ لطافت کی ہے دل میں موجزن
ایک کوزے میں لیے بیٹھے ہیں ہم دریاے عشق

سوزِ غم کے دل جلوں دل سوختوں کے دل کباب
بے گناہوں کا لہو ہے بادۂ میناے عشق

بزمِ محشر میں بھی پیارے بے ترے رونق نہیں
انجمن آرا ہو اب اے انجمن آراے عشق

داغِ دل مُرجھا گئے زخموں کے گل کمھلا گئے
کوئی جلوہ اِس طرف بھی اے چمن آراے عشق

بزمِ جاناں میں ہوئی ذلت تو کیا شکوہ حسنؔ
آبرو سے کچھ غرض رکھتا نہیں رُسواے عشق

🖋 از: استاذِ زمن مولانا حسن رضا بریلوی
انتخاب: مشاہد رضوی

http://www.allamahasanraza.blogspot.in

Mushahid Razvi

استاذِ زمن مولانا حسن رضا بریلوی کے غزلیہ دیوان ثمرِ فصاحت سے ایک خوب صورت غزل آپ کے ذوق کی نذر،۔
انتخاب: مشاہد رضوی

اُس رُخ پہ گیسوے رَسا کچھ اِس طرف کچھ اُس طرف
ہے گردِ مہ کالی گھٹاکچھ اِس طرف کچھ اُس طرف
وہ ہم سے کچھ کھنچنے لگے ہم اُن سے کچھ رُکنے لگے
غماز ظالم کہہ گیاکچھ اِس طرف کچھ اُس طرف
ہے کس کے آنے کی خبر چمکا ہے بختِ رَہ گزر
ہیں جمع لاکھوں مبتلا کچھ اِس طرف کچھ اُس طرف
ہنگامہ حُسن و عشق کا ہم تم اگر کر دیں بپا
ہو جائے مخلوقِ خداکچھ اِس طرف کچھ اُس طرف
دشمن اُڑائیں پے بہ پے ہم یوں رہیں محروم مے
اے ساقیِ رنگیں اَدا کچھ اِس طرف کچھ اُس طرف
اللہ دل کو کیا ہوا یا ربّ جگر کیوں دُکھ گیا
ہے پہلوؤں میں درد سا کچھ اِس طرف کچھ اُس طرف
وہ نازنیں، میں سخت جاں، تیغ و گُلو کا اِمتحاں
احباب مصروفِ دُعا کچھ اِس طرف کچھ اُس طرف
دشمن نے جو اُن سے جڑی قاصدنے وہ ہم سے کہی
ہے بدگمانی کا مزہ کچھ اِس طرف کچھ اُس طرف
ملتا جو آہوں کو اَثر رہتا نہ دشمن ہی کے گھر
ہوتا خیالِ دل رُباکچھ اِس طرف کچھ اُس طرف
وہ آستیں اُلٹے ہوئے ہاتھوں میں تلواریں لیے
کشتے پڑے ہیں جا بجا کچھ اِس طرف کچھ اُس طرف
جب ابتدا تھی عشق کی تھا دل کو میرا دھیان بھی
آتا رہا جاتا رہا کچھ اِس طرف کچھ اُس طرف
سلطانِ خوباں آئے گا ہر راہ میں میلہ لگا
کاسہ لیے لاکھوں گدا کچھ اِس طرف کچھ اُس طرف
محبوبِ جانِ زار بھی پیارا حسنؔ دل دار بھی
دل آج کل ہے آپ کا کچھ اِس طرف کچھ اُس طرف

https://m.facebook.com/mushahidrazvi1979

Mushahid Razvi
جہان سے اُسے کیا کام جو ہو جان سے دُور
جو تم سے دُور ہے گویا ہے سب جہان سے دُور
ہوئے ہیں جب سے ہم اس دَر سے اس مکان سے دُور
ہمارے دم پہ بنی ہے تمہاری جان سے دُور
عدُو کے ہوتے کریں پاس ذلتِ عاشق
یہ بات ہے مرے نزدیک اُن کی شان سے دُور
وہ دستِ شوق کی گستاخیاں وصال کی شب
وہ اُن کا شرم سے کہنا دبی زبان سے دُور
بلائیں غیر کو میں جاؤں تو وہ فرمائیں
مری گلی سے مرے دَر مرے مکان سے دُور
ملا ہے آنکھ کے تارے سے وہ مہِ خوبی
غمِ فراق رہے یا رب اس قِران سے دُور
تلاش کر دلِ گم راہ بے نشاں ہو کر
یہی نشان ہے اُن کا کہ ہیں نشان سے دُور
یہ پاسِ اہلِ محبت کیا کہ محفل میں
رقیب کا نہ ہوا منہ تمہارے کان سے دُور
جو راست باز ہیں کج رَو سے میل رکھتے نہیں
کہ تیر ملتے ہی ہو جاتے ہیں کمان سے دُور
عجب نہیں جو بُلایا ہو جَور کرنے کو
جنابِ دل نہیں کچھ میرے مہربان سے دُور
مرے نصیب کو گردش مجھے دیے چکر
پر اُن کا راہ پہ لانا تھا آسمان سے دُور
عدو کی بزم میں وہ بے بُلائے جاتے ہیں
مرے ہی پاس کا آنا تھا اُن کی آن سے دُور
خرامِ ناز کے نزدیک کوئی چیز نہیں
جو بات فتنۂ محشر کے ہو گمان سے دُور
وہیں چلا دلِ مضطر جہاں سن آیا تھا
اِسی میں خیر ہے رہنا مرے مکان سے دُور
یہ دل کا حال ہے ظالم تری جدائی میں
کہ جس طرح ہو کوئی اپنے مہربان سے دُور
نصیبِ غیر کھلا دل بھی پاس جان بھی پاس
غریبِ اہلِ وفا دل سے دُور جان سے دُور
غمِ فراق اور ایسا غمِ فراق حسنؔ
میں اُن کے دل سے، میرا حال اُن کے کان سے دُور
Mushahid Razvi

نگہِ قہر ہے ہر لحظہ گرفتاروں پر
دیکھیے کیا غضب آتا ہے گنہ گاروں پر

قتل ہونے کی تمنا ہے یہ اُن ہاتھوں سے
خود گلا دوڑ کے ہم رکھتے ہیں تلواروں پر

ساقیا جامِ مئے سرخ کا پھر دَور چلے
دیکھ وہ کالی گھٹا چھائی ہے گل زاروں پر

بڑھ کے نکلے یہ قمر حسن میں تجھ سے توبہ
ایسے سو چاند تصدق ترے رُخساروں پر

بلبلو فصلِ بہاری کا بھروسہ کیا ہے
خاک اُڑ جائے گی دو روز میں گلزاروں پر

کر دے پامال ہی ظالم کہ یہ جھگڑا تو مٹے
ہاتھ رکھتا نہیں کوئی ترے بیماروں پر

تو نے اس شعلۂ عارض سے لگائی پھر لو
دلِ پُر سوز لٹاؤں تجھے انگاروں پر

پوچھنا چھوڑ دیا جب سے مری جاں تو نے
مُردنی چھائی ہوئی ہے ترے بیماروں پر

اے حسنؔ اُٹھو کمر باندھو چلو صبح ہوئی
بُجھ گئیں شمعیں وہ جوبن نہ رہا تاروں پر
Mushahid Razvi





























Mushahid Razvi

Mushahid Razvi

ثمر فصاحت 2013. Powered by Blogger.